დღეს, მარნეულის მუნიციპალიტეტის თვითმმართველობის ხელმძღვანელი პირები მარნეულის ადმინისტრაციულ ერთეულებს ეწვივნენ, სადაც მუსლიმ მოსახლეობას ყურბან-ბაირამის დღესასწაულის დადგომა მიულოცეს.
გამგებელი მერაბ თოფჩიშვილი და საკრებულოს თავმჯდომარე ნაბი აბდულაევი, ადგილობრივი ხელისუფლების წარმომადგენლებთან ერთად თავდაპირველად ქალაქ მარნეულის მოსახლეობას შეხვდნენ, სადაც სპეციალურად ამ დღესასწაულისთვის შეწირული საქონლის ხორცი შეჭირვებულ ოჯახს დაურიგეს. მარნეულის შემდგომ თვითმმართველობის ხელმძღვანელი პირები სადახლოს ტერიტორიულ ერთეულს ეწვივნენ, სადაც შეჭირვებულ ოჯახებს ასევე გადასცეს სადღესასწაულო ნობათი. „მარნეულის გამგეობის სახელით, გულითადად ვულოცავ ყურბან- ბაირამის დღესასწაულის დაწყებას არამარტო მარნეულში, არამედ მთლიანად საქართველოში მცხოვრებ მუსლიმებს. ვუერთდები მათ სიხარულს და თითოეულ მათგანს ვუსურვებ მშვიდობას და კეთილდღეობას.“ - განაცხადა მარნეულის გამგებელმა მერაბ თოფჩიშვილმა. ყურბან-ბაირამი ანუ მსხვერპლშეწირვის დღესასწაული მარხვის თვის რამაზან ბაირამიდან 70-ე დღეს აღინიშნება და სამ დღეს გრძელდება.