5 ივნისს საქართველოს კულტურული მემკვიდრეობის ეროვნული სააგენტოს მიერ დაფინანსებული პროექტის „გერმანული კულტურული მემკვიდრეობის ინვენტარიზაცია/კვლევა საქართველოში“ ფარგლებში მარნეულის მუნიციპალიტეტის სოფელ ულინოვკასა და სოფელ თამარისში არსებული ძველი გერმანული სახლების დათვალიერება/აღწერა განხორციელდა.

აღნიშნულ გასვლით საექსპედიციო ღონისძიებაში ადგილობრივი თვითმართველობის მხარდაჭერით მონაწილეობას იღებდნენ სამხრეთ კავკასიაში გერმანული კულტურული მემკვიდრეობის დაცვის კავშირის წევრი, არქიტექტორ-რესტავრატორი ნესტან თათარაშვილი მარნეულის მუნიციპალიტეტის განათლების, კულტურის, სპორტისა და ახალგაზრდულ საქმეთა განყოფილების მთავარი სპეციალისტი ელგუჯა კუპატაძე, მარნეულის მუნიციპალიტეტის გამგებლის წარმომადგენლები ახკერპისა და თამარისის ადმინისტრაციული ერთეულებში ზაალ ნადირაძე და მირზა ჟორჟოლიანი.
მიმდინარე პროექტი მიზნად ისახავს ბოლნისის, ასურეთისა და თრიალეთის გამორჩეული გერმანული შენობების ინვენტარიზაცია/პასპორტიზაცია/კვლევას. ამასთან ყველა გერმანული დასახლების იდენტიფიკაციას და მისი ლოკაციის დადგენას; ამის ამსახველი სათანადო სამეცნიერო დოკუმენტებისა და რუკების დამზადებას. 
კვლევა სავარაუდოდ გაგრძელდება მომდევნო წლებშიც და ყველა გერმანული დასახლება იქნება შესწავლილი, მათ შორის სოფელი ულიანოვკა და სოფელი თამარისიც. შესწავლის გარდა, ეროვნული სააგენტო მომზადებული დასკვნების საფუძველზე უზრუნველყოფს მათთვის ძეგლის სტატუსის მინიჭებას და კონკრეტულ ობიექტებზე გადაუდებელი დაცვითი ღონისძიებების განხორციელებას.