„მცირემიწიან  ფერმერთა 2015 წლის საგაზაფხულო სამუშაოების ხელშეწყობის პროექტის“ ფარგლებში, აღმოსავლეთ საქართველოში კერძოდ ქვემო ქართლში, კახეთსა და შიდა ქართლში ხვნის სამუშაოები უკვე დაიწყო.

დღეს მარნეულის მუნიციპალიტეტის სოფელ წერეთელში, სოფლის მეურნეობის პროექტების მართვის სააგენტოს ხელმძღვანელი  მარიანა მოროშია, ქვემო ქართლის  რწმუნებულის-გუბერნატორის მოადგილე რამინ ისმაილოვი, მარნეულის მინიციპალიტეტის გამგებლის მოადგილეები ზაურ ტაბატაძე და თეიმურაზ ბერიძე, ქვემო ქართლში რეგიონული პროექტების კოორდინირების სამსახურის უფროსის მოვალეობის შემსრულებელი გიორგი ხომერიკი, შპს „მექანიზატორის“ დირექტორი ზვიად ჩხაიძე და მისი მოადგილე ალექსანდრე ნასარიძე ადგილზე ჩავიდნენ და ხვნის სამუშაოებს გაეცვნენ.
მიმდინარე წელს  სოფელ წერეთელში, 207 ჰექტარი მიწის ფართობი დამუშავდება. მცირემიწიან ფერმერთა საგაზაფხულო სამუშაოების ხელშეწყობის პროგრამით წელს სოფელ წერეთელის 645 ბენეფიციარი ისარგებლებს, აქედან ხვნის ბარათი 478 ფერმერმა უკვე მიიღო. სამუშაოებს შპს „მექანიზატორის“ 10 ტრაქტორი შეასრულებს.
„მცირემიწიან ფერმერთა 205 წლის საგაზაფხულო სამუშაოების ხელშეწყობის პროექტის ფარგლებში“ წინასწარი მონაცემებით,  მარნეულის მუნიციპალიტეტში დახმარებას დაახლოებით 27 000-ზე მეტი ბენეფიციარი მიიღებს. ჯამში კი  ქვემო ქართლის მასშტაბით 91 000-ზე მეტი ბენეფიციარი, აქედან ხვნის ბარათს 50 805 ფერმერი. პროექტის ბენეფიციარების სიაზე მუშაობა ამჟამადაც მიმდინარეობს, ხოლო დაზუსტებული სიები მიმდინარე თვის ბოლოს გამოქვეყნდება.
„მცირემიწიან ფერმერთა 2015 წლის საგაზაფხულო სამუშაოების ხელშეწყობის პროექტის“ ფარგლებში წელს  800 000 ფერმერი მიიღებს მონაწილეობას და მისი ბიუჯეტი 50 მილიონს შეადგენს.
მთავრობის ინიციატივით, სოფლის მეურნეობის სამინისტრომ და სოფლის მეურნეობის პროექტების მართვის სააგენტომ საგაზაფხულო სამუშაოების ხელშეწყობის პროექტი 2013 წელს დაიწყო. წელს სამწლიანი პროგრამის ბოლო ეტაპია. გასული წლებისგან განსხვავებით, ამჯერად ფერმერები დახმარებას შეცვლილი სახით მიიღებენ.
• ბენეფიციარებს, რომლებსაც გააჩნიათ 0,25 დან 1,25 ჰექტარის ჩათვლით სახნავი მიწის ფართობი, მიიღებენ მხოლოდ ხვნის ბარათს, 1 ჰექტარზე 140 ლარის ანგარიშით.
• ფერმერები, რომელთაც საკუთრებაში აქვთ 0,25-მდე მიწის ფართობი, წელს ისარგებლებენ 50 ლარიანი აგრო ბარათით.
• ბენეფიციარები, რომლებიც 0,25-დან 1,25 ჰექტარის ჩათვლით მიწის ფართობს იყენებენ მრავალწლიანი კულტურების წარმოებისთვის, მიიღებენ 1 ფექტარზე 140 ლარის ოდენობის სასოფლო-სამეურნეო საქონელს.
„მცირემიწიან ფერმერთა 2015 წლის საგაზაფხულო სამუშაოების ხელშეწყობის პროექტი“ თებერვლიდან დაიწყო და 1 დეკემბერს  დასრულდება.