საქართველოს იუსტიციის სამინისტროს მმართველობის სფეროში მოქმედმა სსიპ „დანაშაულის პრევენციის ცენტრმა“  და  საქართველოს პროკურატურამ ერთობლივი პროექტის ფარგლებში, „ნაფიცი მსაჯულები იმიტირებული სასამართლო პროცესებითვის“ , სკოლის მოსწავლეებისა და სტუდენტებისთვის სისხლის სამართლის  იმიტირებული სასამართლო პროცესების კვირეული დაიწყეს.
პროექტის ფარგლებში, აპლიკაციის მიხედვით,  შეირჩა 96 ნაფიცი მსაჯულობის კანდიდატი, აქედან  12 ახალგაზრდა შეირჩა მარნეულის მუნიციპალიტეტიდან.
აღსანიშნავია, რომ შერჩეულ კანდიდატებთან პირველი შეხვედრა 2 ნოემბერს გაიმართა საქართველოს მთავარ პროკურატურაში, სადაც ნაფიც მსაჯულთა სასამართლოს განსახილველ საქმეებზე სახელმწიფო ბრალდების ეფექტიანი მხარდაჭერის უზრუნველყოფის სამმართველოს წარმომადგენელმა ახალგაზრდებს გააცნო ნაფიც მსაჯულთა ინსტიტუტის არსი და სასამართლო პროცესის სპეციფიკა.
პროექტის მომდევნო ეტაპი იმიტირებულ სასამრთლო პროცესზე დასწრებას ითვალისწინებს, რომელიც 12 ნოემბერს საქართველოს უზენაეს სასამართლოში გაიმართება, სადაც ახალგაზრდები ჩაერთვებიან ნაფიცი მსაჯულების სტატუსით და პროცესის დასასრულს გამოიტანენ გამამართლებელ ან გამამტყუნებელ ვერდიქტს.
პროექტის მიზანს ახალგაზრდებში სამართლებრივი ცნობიერების ამაღლება და მართლწესრიგის მიმართ ჯანსაღი დამოკიდებულებების ჩამოყალიბება წარმოადგენს.