დღეს, 12 აპრილს, მარნეულის მუნიციპალიტეტის გამგეობაში მორიგი გეგმიური თათბირი გაიმართა, რომელსაც გამგებელი მერაბ თოფჩიშვილი უძღვებოდა. გამგეობის ყოველკვირეულ თათბირს გამგებლის მოადგილეები, სამსახურისა და განყოფილების უფროსები და ადმინისტრაციულ ერთეულებში გამგებლის წარმომადგენლები ესწრებოდნენ.

თათბირზე, გამგებლის ინიციატივით, მოწვეული იყვნენ ენერგო-პრო ჯორჯიას მარნეულის სერვის-ცენტრის, საქართველოს გაერთიანებული სამელიორაციო სისტემების და გაერთიანებული წყალმომარაგების კომპანიების წარმომადგენლები, რომელთაც დამსწრე საზოგადოებას მუნიციპალიტეტში, მათ სფეროში არსებული პრობლემების გადაჭრის გზები, მიმდინარე და დაგეგმილი სამუშაოების მდგომარეობა გააცნეს.
სამუშაო თათბირი ძირითადად კითხვა- პასუხის რეჟიმში წარიმართა, რა დროსაც გამგებელმა სამსახურის ხელმძღვანელებისგან შესრულებული სამუშაოების შესახებ ანგარიშიც მოისმინა და სამომავლო გეგმებზე ისაუბრა.
თათბირზე აქტუალური იყო მუნიციპალიტეტში დაგეგმილი და მიმდინარე ინფრასტრუქტურული პროექტების მიმოხილვა, რის თაობაზეც მარნეულის მუნიციპალიტეტის გამგეობის ინფრასტრუქტურის განვითარების, სივრცითი მოწყობის, არქიტექტურისა და მშენებლობის სამსახურის უფროსმა ლერი ფანგანმა დეტალურად ისაუბრა.
თათბირზე ყურადღება გამახვილდა სოფლებში ელექტრო ენერგის ინდივიდუალური გამრიცხველიანების საკითხზე, სადაც ენერგო-პრო ჯორჯიას მარნეულის სერვის-ცენტრის ხელმძღვანელმა ლევან გუგუჩიამ წარმოადგინა გამრიცხველიანების გეგმა/გრაფიკი მუნიციპალიტეტის მასშტაბით.